1. “Nagadangup kami sa imong panalipod, O Santa nga Inahan sa Dios.”
Sa among paglitok niining mga pulong nga sukad pa sa karaang mga panahon (or gatusan ka katuigan) giampo na sa Simbahan ni Cristo, ania kani sa imong atubangan, among Inahan, niining Tuig sa Pagtuo. Kami, nga mao ang Lawas ni Cristo niining among yuta(ng natawhan), naglitok niining mga pulong sa pagtugyan ug paghalad, diin una sa tanan among gipundok ang mga paglaum ug kabalaka sa katawhang Pilipinhon, niining takna sa among kasaysayan. Inahan sa among katawhan, nalipay kami sa nga gitawag, PUEBLO AMANTE DE MARIA, KATAWHAN NGA NAHIGUGMA KANG MARIA. Nasayud ka sa tanan namong mga pagantus ug mga paglaum, anaa nimo ang ianahanong pagpakabana sa tanang pagpakigbisog batok sa mayo ug sa dautan, sa kahayag ug sa kangitngit, nga nagahulga sa kalibutan karon. Inahan sa among katawhan, dawata kining among pangaghop, nng dinasig sa Espiritu Santo among gipaabot diha sa imong kasingkasing. Gaksa, uban sa gugma sa Inahan ug sa Alagad sa Ginoo, ang among katawhan ug among yuta(ng natawhan), nga karon among gitugyan ug gihalad kanimo, kay nabalaka gayud kami sa yutan-on ug tunhay nga kaugmaon sa matag-usa kanamo ug sa tanang namong katawhan. “Nagadangup kami sa imong panalipod, O Santa nga Inahan sa Dios, ayao isalikway ang among mga hangyo niining takna nga kami nanginahanglan.”
2. Ania kami naga pundok sa imong atubangan, Inahan ni Cristo, ania kami atubangan sa imong Putling Kasingkasing. Ang Simbahan sa Ginoo sa among Yuta, naghiusa sa kasingkasing ug hunahuna uban sa tanan namong katawhan, usa ka Pilipinhong Nasud, buot mi makighiusa sa pagtugyan ug paghalad sa iyang kaugalingon, ngadto sa Amahan nga gihimo sa imong Anak tungod sa iyang gugma alang kanamo: Miingon siya:” ..tungod kanila gitugyan ko ang akong kaugalingon nganha kanimo aron maimo gayud sila.”( Jn.17:19) Buot kami makighiusa sa among Manunobos niining iyang pagtugyan ug paghalad alang sa kalibutan ug alang sa tibuok tawhanong kaliwat, nga diha sa iyang Diosnong Kasingkasing, adunay gahum sa pagdangat sa kapasayloan sa sala ug pagbayad niini.
Ang gahum niining maong pagtugyan sa imong Anak, among Ginoo, naglungtad hangtud sa kahangturan ug nag-apil sa tagsatagsa, sa tanang katawhan ug kanasuran. Busa nagapil usab kini sa among katawhan ug sa among yuta(ng natawhan). Ang gahum niining pagtugyan ug paghalad nagbuntog sa tanang kadautan nga ang espiritu sa kangitngit makapukaw ug nagapukaw na gayud sa among panahon diha sa mga kasingkasing sa mga tawo niining panahona.
Pagkalaum gayud sa among gibati nga pagpangandoy niining pagtugyan ug paghalad sa among katawhan hiniusa sa pagtugyan ni Jesucristo sa iyang kaugalingon, tungod ka yang makaluwas nga buhat sa among Manunubos kinahanglan nga maambit sa kalibutan, ug sa among kaugalingong katawhan, pinaagi sa Simbahan.
Naga lingi kami kanimo, Inahan sa among Manunobus ug Inahan Namo; labaw sa tanang mga binuhat bulahan ikaw, Alagad sa Ginoo, ikaw labing hingpit mituman sa Diosnong tawag. Pagadayegon ka, nga tiunay nahiusa sa makaluwas nga pagtugyan sa imong Anak.
Inahan sa Simbahan, lamdagi ang katawhan sa Dios diha sa dalan sa pagtuo, paglaum ug paghigugma.Tabangi kami sa pagpuyo sa kamatuoran niining pagtugyan nga gihalad ni Jesus, imong Anak alang sa tibuok tawhanong banay, ug alang kanamo, ang Pilipinong Katawhan ug alang sa among hinugugmang Yutang Natawhan.
3. Sa among pag-tugyan kanimo, O Inahan, sa among katawhan, imong “PUEBLO AMANTE DE MARIA,” among gisalig kanimo kining maong pagtugyan, ug amo kining gipahiluna sa imong inahanong Kasingkasing. Putli nga Kasingkasing, tabangi kami sa pagbuntog sa mga panghulga sa dautan nga dali ra nga matisok ug mogamut sa mga kasingkasing sa mga tawo karon, ug ang iyang dili masukod nga mga bunga nagpabug-at na sa kahimtang sa among nasud karon ug daw nagbabag sa mga dalan sa kauswagan alang sa kaugmaon.
4. Gikan sa pagdumot, sa mga madug-anong mga buhat ug paagi, ug mga kagubot nga nagbahi-bahin ug nag-guba sa among katawhan, luwasa kami. Gikan sa sala batok sa tawhanong kinabuhi, sukad sa iyang sinugdanan, luwasa kami. Gikan sa pagpasipala sa dungog sa mga anak sa Dios, luwasa kami. Gikan sa tanang matang sa kakulang sa kaangayan ug katarungan sa kinabuhi sa katilingban, luwasa kami. Gikan sa pagka-andam sa pagyatakyatak sa mga sugo sa Dios, luwasa kami. Gikan sa pagkawagtang sa pagpakabana sa maayo ug sa dautan, luwasa kami. Gikan sa mga sala batok sa Espiritu Santo, luwasa kami.
5. Dawata, O Inahan ni Cristo, kining panghupaw, dinuyogan sa mga paglaum ug mga gibug-aton nga among gipas-an, mga pag-antus sa matag-usa kanamo ug sa tanan namong katawhan. Tabangi kami, uban sa gahom sa Espiritu Santo, sa pagbuntog ug sa pagdaug sa tanang sala; sa tagsa-tagsa nga sala ug ang sala sa kalibutan, ang sala sa tanan niyang matang.
Ipadayag sa makausa pa, diha sa among kaugalingong kasaysayan isip katawhan, ang walay kinutobang gahum sa Kaluwasan, ang gahum sa Maluloy-ong gugma. Makatumpag unta kini sa gahum sa sala ug kadautan dinhi kanamo. Makausab unta sa among mga tanlag. .
Ipadayag unta sa imong Putling Kasingkasing ngadto sa tanan, diha sa among yuta ug sa tibuok kalibutan, ang kahayag sa paglaum!
O Maria, Inahan ni Jesus ug among Inahan, among Kinabuhi, among Katam-is ug among Paglaum. Amen
(Mga representante sa lainlain sector sa Katilingban mahimo mohalad ug mga bulak ngadto sa tiilan sa Imagen sa Mahal nga Birheng Maria, samtang nag-awit og imno kang Maria, samtang gibagting ang lingganay sa Simbahan).
(Gihubad sa Society of the Angel of Peace)
